In ch't Halluinos eximplaire, y s'appelle Ugèn' Debévère !

Son portrait savoureux, écrit en 1990, par Minptido.

Après l’dénier, tus les lundis,

j’passe à Halluinn, printe Ugène

qui m’attind derrir’ sin cassis

et, in auto, adan j’ l’immène

au cherque, à Neuville-in-ferrain,

d’ù qu’ les Wanderer’s y boureltent

et jeutt’nt au quat’ chint vingt et in.

Drot comme in i, agile et svelte,

tchand qu’y s’ pourmène, in l’erconnot

À s’n allure et à sin capeau.

Ch’est in « né-natif » d’Halluin

qui s’esprime aussi facil’mint

in français ou bin in flamind.

Y-a chi, lommint, fait du bon pain,

 et y rinconte d’temps in temps,

dins l’rue, in d’ses anciens crients

qui moute qu’ cha li fait plaiji

d’ervire s’n ancien boulangi.

Euchteur, et d’pus qu’y-est inertraite,

 y-habit’ dins l’ rue Gustav’-Desmette,

inveuc s’ fille et pus sin beau-fi.

Toudis lesse et si  dégourdi,

tcheul âch’ croyi-vus qu’in  li donne ?...

Soixante’ diche ou soixant’ tchzinze ans ?

- Eh bé, nin non !... Y-est bin pus jome !

Y n’a foqu’ quater-vingt treize ans !

Vus m’direz qu’si bin conservé,

yn’a po d’vu grammint ovrer !...

- Taiji-vus ! In tant qu’ boulangi,

y-a fait in des pus durs métis !...

D’sin temps in d’vot, pou fair’ du pain,

pétrir tut l’pâte inveuc ses mains,

in maillot d’corps et presque nu,

tell’mint qu’ dins ch’méti-là in sue !

Y d’vot s’él’ver timpe au matin,

s’intchéter du temps et du vint

pou savoir qu’mint condur’ sin four,

vu qu’ là y n’ faullot po qu’y s’gourre

pou li  pouvoir fair’ du bon apin,

nin trop tchu, doré, jusse à point !

L’ovrache y-étot toudis pressé,

vu qu’y faullot acor après,

in carrette à bras et in ville,

Aller livrer à domicile !...

Wetti Ugèn’, sec comme in cleu,

cha n’a jomais été in greu,

mais ch’est in vif et in nerveux !

Tchan qu’y commande à les bourleux,

yfaut l’vir tcheurir dins l’bourloire

pou moutrer l’ riv’, vous pouvez m’croire :

des  comm’li, j’n’in connos po deux,

et, inveuc cha, toudis joyeux !

Dins s’jeunesse, y jeuot au foot

et n’étot po d’ceuss’s qui s’infoutent.

Y-a toudis jeué pou gagni !

Et, àl’bourle, y fait cha aussi !

Au cherque, l’ lundi soir, alfos,

in raconte l’conte et in bot

in p’tit verre inveuc les copains.

Ch’est là qu’inn bell’ fos, sinn’ de rin,

veyant des grchons fair’ des pompes,

ugène, à quater-vingt dije ans,

y-est v’nu, tut d’inn’ les interrompe,

leu dijant : « Mi, j’in fais autant ! »

«  - Vas-y, qu’y-ont dit, in t’paye in verre,

si te l’fais chi, d’vant nous, à terre ! »

Adan, y-a tiré sin veston,

et, pou leu donner inn’ leçon,

à plat inte et tut in souplesse,

y-a moutré qu’y-étot assez lesse

pou leu fair’ douz’ pomp’s in suvant

d’vant l’ comptoir et tus les crients !

Y voulot, à propos de s’n âche,

aux jom’s délivrer in messache

que j’ m’in vas vous tradure ich

tel que j’cros bin l’avoir compris :

« Tchan qu’in homme y-arrête d’b ougi,

ch’est adan, seul’mint, qu’y vieuzit ! »

Sam’di, ch’étot s’n anniversaire :

Y-a quater-vingt treinze ans qu’y vit !...

Pourtant, Ugèn’ qu’y-a vu deux djerres

et qu’y-a même été prijonni,

à Halluin souvint s’ pourmène,

 et, aux Wanderer’s ou à Roncq,

bourle acor deux fos par semaine.

Tertus et s’ feimme in conclut donc

qu’ ch’est li l’pus ancien des bourleux

qui, d’ Halluin jusqu’à Tourco,

pratique acore ch’ royal jeu.

Y s’y défind comme in vrai ro

et, dins l’ bourloirr, in r’tint s’n haleine

tchan qu’ d’in long plat, du premi cop,

- ch’t’ inne espécialité d’Ugène,

y lanche s’ bourle et vint fair’ jo !

Ch’ vaillant bourleu, acor si vert,

connu pou sin djai caractère,

s’invint’ mêm’ des anniversaires

pou li pouvoir payi in verre,

in donnant essin, sinn’ de rin,

inn’ boinn’ leçon à les radins !

Ugène, au fond, ch’est in malin :

vu qu’in peut dir’ que, final’mint,

viv’ lommint, fair’ durer l’plaiji,

ch’est là toute inn’ philosophie !

Adan , tchan que j’pinse à Ugène,

je m’dis souvint : «  Tcheu phénomène ! »

V’la qu’in prononçant sin prénom,

j’ m’aperços que j’ n’ai nin dit l’nom

dech’t Halluinos eximplaire :

Y s’appelle Ugèn’ Debévère !

                                                          Minptido

(Archives, D.D., N.E., 16/12/1990).


L I E N S :  La Bourle Halluinoise en Plein Essor...

L'Association de Gestion du Cercle Saint Joseph d'Halluin.